… Deuston eskuratutako zuzentasun, zorroztasun eta elkartasun balioek asko lagundu didate abokatu gazte gisa hasi nintzenetik. Ekonomia espezialitateak ere lagundu zidan azkarrago aurrera egiten. Gaur egun zabalduago dago Zuzenbideko karreran ekonomia espezialitatea egitea, baina Deustuko Unibertsitatea zen, duela 25 urte karrera hasi nuenean, eskaintzen zuen bakarrenetakoa.
Graduko ikasketak Bilbon egin zenituen, nazioarteko mugikortasuna Leuvenen eta, ondoren, masterra Brujasen. Zerk bultzatu zintuen zure prestakuntza juridiko-ekonomikoa Belgikan osatzera, gero herrialde horretan abokatutzan geratzeko?
Deustuko Unibertsitateko Zuzenbideko Ekonomia Espezialitatea egin nuen, Bilbon, eta laugarren mailan Leuvengo Unibertsitate Katolikoan lehiaren zuzenbidea ezagutu nuen. Koen Lenaertsek, gaur egun EBko Justizia Auzitegiko presidente berrituak, Europako zuzenbide prozesaleko klasea ematen zuen, eta bere klasean Luxenburgoko EBko Auzitegira joan ginen eta moot court batean parte hartu nuen; izugarri gustatu zitzaidan. Brusela, EBko gune neuralgikoa eta EBko lehiaren arloko foro nagusia, nire radarrean zegoen jada.
Brujasko Europako Ikastetxean Europako Zuzenbideko eta Ekonomiako Masterra amaitu ondoren, zure ibilbide profesionala abokatuen enpresa batean hasi zenuen, Howrey LLPn eta Lehiaren Zuzenbidean espezializatu zinen. Ia sei urte geroago, Shearman & Sterling LLPra jauzi egin zenuen eta 2017an Bruselako bulegoan bazkide hautatua izan zinen. Noiz jabetu zinen Lehiaren Zuzenbiderako zenuela joera?
Europako Ikastetxeko Zuzenbide eta Ekonomia Masterrean (ELEAko lehen promozioa) lehiaren zuzenbidean espezializatu nintzen. Kontzentrazioen kontrolerako test berriari buruz egin nuen tesia – lehiaren zuzenbidea modernizatu zen urtea zen, une aparta. Brujaseko Moot Court-ean ere parte hartu nuen eta masterra amaitu aurretik Howrey bulego amerikarrarekin sinatu nuen. Urteetan hauetan zehar, lehiaren Europako zuzenbidearen bilakaera ikusi dut, eta nazioarteko bezeroei aholkuak eman dizkiet sektore garrantzitsuetan, hala nola finantza, garraio, teknologia eta energia sektoreetan, Europako Batzordeak eta agintari nazionalek irekitako zehapenetan, nazioarteko kolusio-akordioen (kartelak) ikerketan, nagusitasun-posizioko abusuetan, kontzentrazio ekonomikoen jakinarazpenetan eta estatu-laguntzetan. Lehiaren arloko gaiak auzitegi nazionaletan eta, bereziki, EBko Auzitegian defendatzea da nire espezializazio-arlo gustukoenetako bat. Sakrifizio handiak eskatzen dituen lanbidea da, baina aukera eta poztasun asko ere ematen ditu; ni neu giza esperientziarekin geratzen naiz, batez ere.
Lehiaren zuzenbidearen bilakaera frenetikoa izaten ari da azken urteotan, eta oso gertutik jarraitzen dut, bai Europan, bai estatuan. Sarritan argitalpen espezializatuetan parte hartzen dut eta hitzaldiak eta eskolak ematen ditut hainbat unibertsitatetan, Europako Ikastetxearen udako mintegietan, jarduneko abokatuentzat eta lehiaren arloko agintarientzat.
Zer neurritan lagundu zuen Deustuko Unibertsitatean jaso zenuen prestakuntzak zure karrera profesionala bideratzen?
Lehiaren Europako Zuzenbideko abokatu gisa jarduteko erabakia Brujaseko Europako Ikastetxeko Masterrean hartu nuen. Hala ere, Deuston eskuratutako zuzentasun, zorroztasun eta elkartasun balioek asko lagundu didate abokatu gazte gisa hasi nintzenetik. Ekonomia espezialitateak ere lagundu zidan azkarrago aurrera egiten. Gaur egun hedatuago dago Zuzenbidean ekonomia espezialitate egitea, baina Deusto zen, duela 25 urte karrera hasi nuenean, eskaintzen zuen bakarrenetakoa. Lehiaren zuzenbideko gaiek analisi ekonomikoa behar dute lehiaren agentziek proposatutako merkatu-dinamikak eta kalteen teoriak ulertzeko.
Zure lanak eskatzen dizun pribatutasuna eta diskrezioa errespetatuz, kontatuko zeniguke zer-nolako kasuei aurre egin behar izan diezun, zein erronkari aurre egin behar izan diezun eta zein izan diren zure lorpen nagusiak?
Ia 20 urte hauetan, Europako Batzordearen aurrean kasu askotan lan egiteko zortea izan dut, adibidez, finantza-zerbitzuen arloko transakzio-prozeduraren lehen kasuetan, hala nola Libor, Forex eta bonu subsubiranoen arlokoetan, non merkatuei aholku ematearen konplexutasuna gaien nazioarteko dimentsioak zabaltzen baitzuen. Baita merkatu digitaletan nagusitasun-posizioko abusu kasuetan, estatu-mailako laguntzen kasuetan eta mundu-mailako kontzentrazio-eragiketetan ere. Kasuaren estrategia globala planifikatzea eta mundu osoko lehiaren agintaritzekin prozesuak kontrolatzea izan da gehien gustatu zaidan erronka, Europatik kanpoko bulegoko kideekin eskuz esku lan egitea eskatu didalako. AEBn eta Japonian lan egitea tokatu zait, adibidez, denboraldi luzeetan. Kasu horietan, gakoa legelari talde eta estrategien koordinazioa da, eta lorpenik handiena bezeroa pozik edukitzea da, haren helburu komertzialak errespetatzen direla ziurtatzen baituzu.
Lehiako kasuez gain, Gizarte Erantzukizuneko eta Giza Eskubideetako gaietan ahal dudanean inplikatu ahal izatea ere baloratzen dut, gizartean denen onerako lana egitea (probono), adibidez, ingurumen eta ESG gaietan lan egin dut, bai eta gora bidean dauden herrialdeetako eta garapen bidean dauden herrialdeetako emakumeen defentsan ere.
Bukatzeko, zenbaki honetan parte hartzeagatik eskerrak emateaz gain, azken galdera bat egin nahi dizugu. Zer oroitzapen gordetzen dituzu Deustuko Unibertsitateko ikasgeletan emandako urteez?
Gugghenheim Bilbao inauguratu zutenean hasi nituen ikasketak, ikusgarria izan zen hain gertutik bizi ahal izatea. Oso oroitzapen polita dut Unibertsitateaz eta Deustoko urteetako lagunez, eta Deustuko Ikastetxe Nagusiaz. Oso ondo pasatu nuen nire ahizpa Beatrizekin, aldi berean Zuzenbidea eta ekonomia espezialitatea ikasi baitzuen Deuston. Nortasuna landu eta lagunak egiteko urteak izan ziren.
