Skip to main content

Alberto López de Biñaspre Maurolagoitia

By 12 otsaila, 202111 ekaina, 2021Elkarrizketak
gure sektorean lider gisa kokatzen jarraitzea… Helburu hori lortzeko sekretua gure taldeen garapenean oinarritzen da eta gure enpresa kultura bera aldatzean. Gure arrakasta fabrikazio aurreratuaren eta 4.0 industriaren munduko berrikuntzaren alde konpainiak egin duen apustu estrategikoan datza. Horri esker, hazten ari gara, enplegua sortzen eta gure taldeak lanbidean garatzen.

2018tik Lantek-eko zuzendari nagusia zara. CAR/CAM/MES/ERP software soluzioen garapen eta merkaturatzearen garapeneko multinazionala da eta aitzindaria metaleko sektoreko enpresen aldaketa digitalean. Zelan baloratzen duzu zuen lehiakide zuzenekiko harremana? Fikzioak kontatzen digun bezala, patenteak, bezeroak eta/edo merkatu kuotak lortzeko kuartelik gabeko gerra da ala, alderantziz, badago inolako lankidetza harremanik sektoreko enpresen artean? Eta tokiko inguruan? Eta nazioartean?

Lehia funtsezko elementua da edozein industriatan, bereziki sektorerik aurreratuenetan eta teknologikoenetan. Izan ere, horrek bidea zabaltzen du merkatu librea errealitatea izan dadin eta enpresei onurak ekartzen dizkien tresna bat da, ikasten, eboluzionatzen eta hobetzen behartzen baikaitu. Pizgarri bat da etengabeko hobekuntzarako eta merkatu global eta oso aldakorrean hazteko bidea. Sarri askotan, hobekuntzak ekartzen ditu produktuen garapenean eta bezeroei ematen zaizkien zerbitzuetan. Azken batean, berrikuntzan funtsezko giltzarria da.

Jakina, hori guztia beti gertatzen da lehia on eta leialeko testuinguruetan, “fair play” deitu izan zaion horretan. Lehiatzeko moduan erakusten dira hoberen, hain zuzen ere, konpainia bakoitzaren balioak, oinarriak eta etika, baita zuzendarien compliance mailan ere, haiek eraikitzen eta definitzen baitute beren enpresa kultura.

Lehiako testuinguru honetan, guretzat, Lantek-en, garrantzizkoa da lankidetza eta sinergiak etengabe bilatzea, bezeroentzako hobekuntza ekartzen baitu beti, baita produktibitatea eta eraginkortasuna ere, lehiakorrago bihurtuz. Praktika baliotsua da, berrikuntzaren aldeko apustua egiten baitugu eta horren barruan sartzen dugu AFM edo Gaia bezalako kluster sektorialekiko lankidetza, beste enpresa batzuekiko proiektu estrategikoetan edo Unibertsitateekiko lankidetzetan.

Esparru pertsonalean, zer sentitzen da sektorean mundu mailako multinazional liderren arteko hogeita hamar euskal enpresetako bateko arduradun izanda?

Zalantzarik gabe, harrotasuna eta erantzukizun handia ere bai. Itxaropenak beti dira altuak eta horrek etengabe berrikuntza prozesuan eta etengabeko berrikuntzan begiak jarrita egotera garamatza, industriaren beharrizanei aurrea hartzeko eta sektoreko liderren artean kokatuta egoten jarraitzeko.

Niri neuri esperientziak erakutsi dit helburu hori lortzeko sekretua gure taldeen garapenean oinarritzen dela eta gure enpresa kultura bera aldatzean. Gure arrakasta fabrikazio aurreratuaren eta 4.0 industriaren munduko berrikuntzaren alde konpainiak egin duen apustu estrategikoan datza. Horri esker, hazten ari gara, enplegua sortzen eta gure taldeak lanbidean garatzen.

Bestalde, nazioarteratze maila altua izatea dugu beste zutabe eta erronka bat eguneroko lanean; teknologia eta joera berriak noiz sortuko adi egotera behartzen gaitu zuzenean gauden 14 herrialdeetan, baita gure soluzioak banatzen ditugun gainerako nazioarteko merkatuetan ere.

Arabako Parke Teknologikoan du egoitza Lantek-ek eta Amerikako (AEB, Mexiko, Argentina eta Kanada), Europako (Alemania, Frantzia, Italia, Polonia eta Erresuma Batua), Ekialde Ertaineko (Turkia eta Arabiar Emirrerri Batuak) eta Asiako (Txina –Shanghai, Tianjin eta Wujan–, Hego Korea –Busan eta Seul) 14 herrialdetan ditu bulego propioak. Lau eskualde handi eta oso desberdinak dira, batere homogeneoak ez direnak barrutik begiratuta, eta bakoitza sentsibilitate tekniko, produktibo eta komertzial ugarikoak. Zer berdintasun ikusten duzu haien artean, mundu mailako ikuspegitik begiratuta? Zeintzuk izango lirateke, zure ustez, alderik handienak?

Hala da, taldeen eskutik eta bezero eta partnerrekin batera lan eginez, 35 urtetan bilakatu eta hazi den konpainia bat gara. Zorionekoak gara eta eskerrak ematekoa da honaino heldu izana. Berrikuntzaren aldeko apustu sendoak nazioartean sendotasunez kokatzeko modua eman digu 4.0 industriaren esparruan eta lider bihurtu gaitu metalaren sektoreko fabrikazio aurreratuko eta softwareko soluzioen nitxoan.

Nazioarteratze maila altua da gure zutabeetariko bat, eta negozioari eta taldeari ematen dion balioa eta egonkortasun handia agerian geratzen dira urte korapilatsuetan, 2020an esaterako, konplexutasuna gorabehera hazten jarraitu baitugu eta I + G-an inbertsioak egiten.

Multinazional heldua gara, hamalau herrialdetan presentzia zuzena eta bulego propioak dituena. Ezaugarri horiek herrialde desberdinetako sektorearen eta joeren ikuspegi globala ematen digute. Hala lortu dugu aurten 25.000 bezeroko kopuru historikoa gainditzea.

Eta hori dena egin dugu tokiko ikuspegia duen enpresa global izateko estrategia begien bistatik galdu gabe, merkatu bakoitzera egokituz eta herrialde bakoitzaren idiosinkrasia kontuan hartuta; berezitasunak eta kultura, negozioak egiteko modua, merkatu beharrizanak, bezeroari tokiko hizkuntzan zerbitzua emanez (18 hizkuntzatan ematen dugu zerbitzua), etab.

Apustu estrategikoa da, gure bezeroengana hurbiltzeko, haien beharrizanak hobeto ulertzeko eta soluzio egokituak eskaintzeko modua ematen diguna, bezeroen arazoak konpondu eta lehiakor bihurtzeko. Eredu horren arrakastaren adierazle argi bat dugu: gure fakturazioaren % 90 nazioarteko merkatutik dator.

Eskualde guztiak berdintzen dituen ezaugarri bat aipatu beharko banu, esango nuke denek dutela bilakatzeko helburua eta industriaren digitalizazioa erraztea, hartara fabrikatzaileei 4.0 industriarako trantsizioari eta digitalizaziori ekiteko, lehiakorrak eta eraginkorrak izateko merkatu globalean. Industriak, munduko edozein herrialdetan, soluzioak eskatzen ditu, prozesuen eraginkortasuna areagotzeko, kostuak murrizteko eta kalitatea igotzeko. Lantek-en teknologia bideratzaileak aplikatzen ditugu: gauzen Internet, Big Data, Adimen Artifiziala, etab., aipatutako helburuak lortzeko eta fabrikazio digital eta konektatuan aurrera egiteko eta gure bezero eta partnerren lehiakortasuna babesteko.

2002tik zure lanbideko karrerak nazioarteko ikuspegi argia izan du: taldeak lideratu dituzu lan egin duzun konpainietako esparru desberdinetan eta mundu zabaleko toki askotan. Zure ustez, zeintzuk izan dira zailtasunik handienak multinazional baten enpresa kultura eta tokiko kulturak eta tradizioak bateratzeko orduan?

Bai, hala da. Beti gozatu izan dut nazioarteko inguru eta proiektuetan lan egiten, diziplina ugariko taldeetan eta oso inguru desberdinetan. Lortu beharreko erronketariko bat da oreka lortzea denen kultura komuna sortzearen, toki bateko izateko sentimendua indartzearen eta taldeak funtzionatzea lortzearen artean, eta, bestalde, tokiko unitateen prozesuak astundu gabe egitea, proiektuak eta zerbitzuak sentiberatasunez eta tokira egokituta exekutatuz, arrakasta izateko eta hazi ahal izateko.

Zer gomendio emango  zenieke Lantek-ek ordezkatzen duen bezalako enpresa proiektuetara bildu nahi duten Deustuko Unibertsitateko Ingeniaritzako Alumniei?

Nire esperientzia propioa partekatuko nuke, beren bidean lagungarri izango bazaie. Hiru gauza gomendatuko nizkieke. Lehenengo, sektorean erreferente diren eta ingeniari moduan lanbidean garatzeko erronka teknologikoak eskainiko dizkieten enpresak bilatzeko. Beste alde batetik, balioa emateko proiektuak ikuspegi globala izateari eta enpresak nazioartean presentzia izateari. Izan ere, faktore horiek mundua zabalduko diete, beste aukera batzuk emango dizkiete, beste kultura batzuk ezagutzeko esperientzia biziko dute, beste herrialde batzuetan lan egiteko eta arazo teknikoei eta bizitzakoei aurre egiteko eta arazo horiek konpontzeko beste era batzuekin aberastuko dira. Azkenik, alderdi horiez gain, esango nieke ukitu ezin direnei ere balio handia emateko, batez ere kulturari eta enpresaren balioei, hori biziko baitute egunerokoan, proiektuan, horrek egiten baitu lanbideko proiektuak zentzua izatea.

Zure denboragatik eskerrak ematen dizkizugu. Amaitzeko, kontatuko zeniguke Deustuko Unibertsitateko ikasgeletan igarotako urteetako oroitzapenen bat?

Plazera izan da tarte hau partekatzea. Urte haietako oroitzapen onak ditut, baita lagunenak ere, funtsezko fasea izaten baita garai hori ikasleentzat. Gogoan ditut laborategiko ordu amaiezinak, proiektu bakoitza martxan jartzea lortu arte. Gerora garrantzi handia izan du horrek proiektuak exekutatzeko eta martxan jartzeko orduan. Eta, zelan ez, Iriondo, Tajes edo Evaristo Kahoraho bezalako irakasleen klase mitikoak.